یانەی ئەتلەتیکۆ مەدرید توانی ببێتە پاڵەوانی خولی ئیسپانیا

لە هەفتەى 38 و کۆتایى خولى پلە یەکى تۆپى پێى ئیسپانیا، ئەتلەتیکۆ مەدرید بە دوو گۆڵ بەرامبەر بە گۆڵێک لە بەلەد وەلیدى بردەوە

 سەرەتا یانەی بەلەدوەلید گۆڵێکی لە ڕێگەی پلانۆ تۆمار کرد بەڵام دواتر و لە خولەکی (57) کۆریا و لە خولەکی (67) سوارێز دوو گۆڵی بردنەوە بۆ ئەتلەتیکۆ تۆمار بکەن و لویس سوارێزیش بە باشترین یاریزانى یارییەکە دیاریکرا. 

بەم ئەنجامە، ئەتلەتیکۆ مەدرید بە کۆکردنەوەى 86 خاڵ و بۆ 11یەمین جار لە مێژوویدا نازناوى خولەکەى بەدەستهێنا و کێبڕکێکەى لە ڕیاڵ مەدرید بردەوە، 

یانەی ریاڵ لەم هەفتەیەدا بە دوو گۆڵ بەرامبەر بە گۆڵێک سەرکەوتنى بەسەر ڤیاڕیاڵدا تۆمارکرد،

 بەڵام بردنەوەکە سودى پێ نەگەیاند و نازناوەکەى لەدەستدا. 

لە یارییەکانى تردا، بەرشەلۆنە بەبێ لیۆنێل میسى و بە گۆڵێکى بێ بەرامبەر لە ئیبارى بردەوە و سێڵتا ڤیگۆش بە دوو گۆڵ بەرامبەر بە سێ گۆڵ بە ڕیاڵ بیتیس دۆڕا. 

بەفەرمیش بەلەد وەلید و هوێسکا شانبەشانى ئیبار بەدواییەکدا بۆ خولى پلە دووى ئیسپانیا دابەزین،

 ڕیاڵ سۆسیداد و ڕیاڵ بیتیسیش سەرکەوتنیان بۆ خولى ئەوروپا بەدەستهێنا و ڤیاڕیاڵیش بەشدارى لە پاڵاوتنى هەمان خولدا دەکات.